ಜೀವನದ ಯಾನ!!!

ಕತ್ತಲ ರಾತ್ರಿಯ ಆ ತಲ್ಲಣ; ಕಾಲಾಂತರದ ಆಕ್ರಂದನ,

ಕುಡಿಯೊಡೆಯಿತು ನವಚೇತನ.

ಹೊರಟಿತು ಸುಖದುಖಃಗಳ ಯಾನ.

ನಿಸರ್ಗಕ್ಕೆ ಲಾಭವೂ ಇಲ್ಲ ನಷ್ಟವೂ ಇಲ್ಲ ;

ಇರುವುದು ಚೇತನಕೆ ಮಾತ್ರ.

ಇದು ಗಣಿತವಲ್ಲ,

ಜೀವನದ ಸಂಘರ್ಷಗಳನೆದುರಿಸಿದ ಫಲಾಫಲ.

ಗಮ್ಯ ತಲುಪುವ ಮುನ್ನ ಲಾಭ ಉಂಡವರು ಕೆಲವರು,

ಯೋಗಿಗಳು, ಯಾನರಹಿತರು.

ನಷ್ಟ ಉಂಡವರ ಮುಂದಿನ ಯಾನ??!!

ಕನ್ನಡದ ಕೊಲೆ

ಸೂಚನೆ : ಕನ್ನಡದ ಪರ ‘ಓರಾಟ’ ಮಾಡುವವರು ಈ ಹರಟೆಯನ್ನು ಓದಿ ‘ಹೋರಾಟ’ ಮಾಡಲು ಶುರು ಮಾಡಿದರೆ ಅದಕ್ಕೆ ನಾವೇ ಜವಾಬ್ದಾರರು.

ಕೊಲೆ ಎಂದ ತಕ್ಷಣ ಗಾಬರಿಯಾದಿರಾ? ವಾಟಾಳ್‍ಗೋ, ನಾರಾಯಣಗೌಡರಿಗೋ, ಪ್ರವೀಣ್ ಶೆಟ್ಟಿಗೋ ಕರೆ ಮಾಡಲು ಹೊರಟಿದ್ದೀರಾ? ಈ ಕೊಲೆಯನ್ನು ನಿಲ್ಲಿಸಲು ಅವರಿಂದ ಸಾಧ್ಯವಿಲ್ಲ. ವಿಪರ್ಯಾಸವೆಂದರೆ ಕೆಲವು ‘ಸೋ ಕಾಲ್ಡ್’ ಕನ್ನಡದ ರಕ್ಷಕರಿಂದಲೇ ಈ ಕೊಲೆ ನಡೆಯುತ್ತಿದೆ. ಮೇಲೆ ಹೆಸರಿಸಲ್ಪಟ್ಟವರಲ್ಲಿ ಒಬ್ಬರಿಂದ ಈ ಕೊಲೆ ಅವ್ಯಾಹತವಾಗಿ ನಡೆಯುತ್ತಿದೆ ಎಂಬುದು ನಿಮಗೆಲ್ಲರಿಗೂ ತಿಳಿದಿರುವ ವಿಷಯ.

‘ಈ ಕನ್ನಡದ ಕೊಲೆ ಕೇವಲ ಮಾತನಾಡುವಾಗ ಅಷ್ಟೇ ಅಲ್ಲ, ಬರವಣಿಗೆಯಲ್ಲೂ ಕಂಡುಬರುತ್ತದೆ. ನಾನೊಮ್ಮೆ ರಸ್ತೆಯಲ್ಲಿ ನಡೆಯುತ್ತಿರುವಾಗ ಒಂದು ಗೋಡೆ ಬರಹವನ್ನು ನೋಡಿದೆ. ಅದರಲ್ಲಿ ಹೀಗೆ ಬರೆದಿತ್ತು. ಈ ‘ಜಗ’ದಲ್ಲಿ ಮಲ ಮೂತ್ರ ವಿಸರ್ಜಿಸುವವರನ್ನು ಶಿಕ್ಷೆಗೆ ಗುರಿಪಡಿಸಲಾಗುವುದು’. ಅಬ್ಬಾ!!! ಇದೇನಿದು? ಮಲ ಮೂತ್ರಗಳನ್ನು ಕಟ್ಟಿಕೊಂಡಿರುವುದು ಹೇಗೆ ಎಂದು ಚಿಂತಿಸುತ್ತಿರುವಿರಾ? ಇಷ್ಟೆಲ್ಲಾ ಅವಗಡಗಳಿಗೆ ಆ ಬರಹದಲ್ಲಿ ಕನ್ನಡದ ಕೊಲೆಯಾಗಿರುವುದೇ ಕಾರಣ. ಆ ವಾಕ್ಯದಲ್ಲಿ ‘ಜಗ’ದ ಬದಲು ‘ಜಾಗ’ ಎಂದು ಹಾಕಿ ನೋಡಿ. ಆಗ ವಾಕ್ಯ ಅರ್ಥವತ್ತಾಗಿರುತ್ತದೆ. ಕೇವಲ ಕಾಗುಣಿತ ವ್ಯತ್ಯಾಸದಿಂದ ಎಷ್ಟೆಲ್ಲಾ ಅಪಾರ್ಥ ಉಂಟಾಯಿತು ಅಲ್ಲವೇ? ಇಲ್ಲಿ ಯಾರೋ ಸಾಮಾನ್ಯ ವ್ಯಕ್ತಿಯಿಂದ ತಪ್ಪಾಗಿದೆ. ಆದರೆ ಕೆಲವು ಗಾಯಕರು ಎಲ್ಲವನ್ನೂ ತಿಳಿದಿದ್ದರೂ ಕನ್ನಡವನ್ನು ಕೊಲ್ಲುತ್ತಾರೆ. ಅದನ್ನು ಮಾತ್ರ ಸಹಿಸಲಸಾಧ್ಯ. ‘ನೀನೆ ದಯಾಳು ನಿರ್ಮಲ ಚಿತ್ತ ಗೋವಿಂದ, ನಿಗಮಗೋಚರ ಮುಕುಂದ’, ದಾಸರ ಈ ರಚನೆ ಬಹಳ ಜನಪ್ರಿಯವಾಗಿದೆ. ಈ ಹಾಡನ್ನು ಆಕಾಶವಾಣಿಯಲ್ಲಿ ಗಾಯಕಿಯೊಬ್ಬರು ಹೀಗೆ ಹಾಡುತ್ತಾರೆ. ‘ನೀನೆ ದಯಾಳು ‘ನೀರ್‌ಮಲ’ ಚಿತ್ತ ಗೋವಿಂದ, ನಿಗಮಗೋಚರ ಮುಕುಂದ’. ಅಬ್ಬಾ ಎಂತಹ ಅಭಾಸ!! ರಾಗಕ್ಕೆ ತಕ್ಕನಾಗಿ ಹಾಡುವ ಭರದಲ್ಲಿ ಸಾಹಿತ್ಯಕ್ಕೆ ಇಷ್ಟೊಂದು ಅಪಚಾರ ಎಸಗುವುದೇ?. ಈ ಹಾಡನ್ನು ಕೇಳಿದರೇ ಭೇದಿ ಬಂದ ಅನುಭವವಾಗುತ್ತದೆ.

ಹೀಗೆ ಭಾಷೆಯ ದುರ್ಬಳಕೆಯ ಬಗ್ಗೆ ಮಾತನಾಡುವಾಗ ಒಂದು ಸ್ವಾರಸ್ಯಕರ ಘಟನೆ ನೆನಪಿಗೆ ಬರುತ್ತದೆ. ಒಮ್ಮೆ ವ್ಯಕ್ತಿಯೊಬ್ಬ ಉಪಹಾರ ಗೃಹಕ್ಕೆ ಹೋಗುತ್ತನೆ. ಅಲ್ಲಿ ಆತನಿಗೆ ‘ವರದರಾಜ ಬಾಣಾವಾರ’ ಎಂಬ ಬರಹ ಕಾಣುತ್ತದೆ. ಆಗ ಆತ ಆ ಉಪಹಾರ ಗೃಹದ ಮಾಲೀಕನನ್ನು ತಮ್ಮ ಹೆಸರು ವರದರಾಜ ಅಲ್ಲವೇ ಎಂದು ಪ್ರಶ್ನಿಸುತ್ತಾನೆ. ಆಗ ಮಾಲೀಕ ಇಲ್ಲವೆನ್ನುತ್ತಾನೆ. ಆಗ ಗಿರಾಕಿ ಹಾಗಾದರೆ ತಮ್ಮ ಊರು ಬಾಣಾವಾರವೇ? ಎಂದು ಕೇಳುತ್ತಾನೆ. ಆಗ ಮಾಲೀಕ ಮತ್ತೆ ಇಲ್ಲವೆನ್ನುತ್ತಾನೆ. ಗಿರಾಕಿಗೆ ಬಹಳ ಆಶ್ಚರ್ಯವಾಗುತ್ತದೆ. ಹಾಗಾದರೆ ಹೀಗೇಕೆ ಬರೆದಿದ್ದೀರಿ ಎಂದು ಆ ಬರಹವನ್ನು ತೋರಿಸುತ್ತಾನೆ. ಆಗ ಮಾಲೀಕ ರೇಗುತ್ತಾ, ಏನ್ರೀ, ನಿಮಗೆ ಅಷ್ಟೂ ಓದಲು ಬರುವುದಿಲ್ಲವೇ. ಅದು ‘ವಾರದ ರಜೆ ಭಾನುವಾರ’ ಎಂದು ಹೇಳುತ್ತಾನೆ. ಆಗ ಗಿರಾಕಿ ಹೀಗೆ ಹಿಗ್ಗಾಮುಗ್ಗಾ ಕನ್ನಡದ ಕೊಲೆಯಾಗುತ್ತಿರುವುದಕ್ಕೆ ಬೇಸರಿಸಿಕೊಂಡು ಅಲ್ಲಿಂದ ತೆರಳುತ್ತಾನೆ. ಹೀಗೆ ಕೆಲವರು ತಪ್ಪು ಬರೆಯುವುದಷ್ಟೇ ಅಲ್ಲದೆ ಅದನ್ನೇ ಸಮರ್ಥಿಸಿಕೊಳ್ಳುತ್ತಾರೆ. ಇನ್ನಾದರೂ ನಮ್ಮ ಕನ್ನಡಿಗರು ಎಚ್ಚೆತ್ತುಕೊಂಡು ತಮ್ಮನ್ನು ತಾವು ತಿದ್ದಿಕೊಳ್ಳಬೇಕು. ಹೀಗಾದರೆ ಮಾತ್ರ ಕನ್ನಡದ ಕೊಲೆ ನಿಲ್ಲುತ್ತದೆ ವಿನಃ ಯಾವುದೇ ಚಳುವಳಿ ಪ್ರತಿಭಟನೆಗಳಿಂದಲ್ಲ.

ಕೊನೆಹನಿ : ಕನ್ನಡದ ಕೊಲೆಯಾಗುವುದು ನಿಂತು ಎಲ್ಲರೂ ಕನ್ನಡವನ್ನು ಸರಿಯಾಗಿ ಮಾತನಾಡಲು, ಬರೆಯಲು ಕಲಿತರೆ ನಾವು ಹೆಮ್ಮೆಯಿಂದ ‘ಕನ್ನಡಾಂಬೆ ಗಲ್ಗೆ’.... ಕ್ಷಮಿಸಿ ಈ ಲೇಖನ ಬರೆಯುತ್ತಾ ನನಗೂ ಈ ರೋಗ ತಗುಲಿರಬೇಕು, ‘ಕನ್ನಡಾಂಬೆ ಗೆಲ್ಗೆ’ ಎನ್ನಬಹುದು ಅಲ್ಲವೇ?

ಲೇಟ್ ಲತೀಫ್ ಗೌಡರೂ, ಸತ್ಯಕ್ಕನ ಚಿನ್ನವೂ

ಈ ಕೆಳಕಂಡ ಕಥೆಯಲ್ಲಿ ಬರುವ ಎಲ್ಲಾ ಸನ್ನಿವೇಶಗಳೂ ಹಾಗೂ ಪಾತ್ರಗಳೂ ಯಾವುದಾದರೂ ಒಬ್ಬ ವ್ಯಕ್ಥಿಗೆ ಖಂಡಿತವಾಗಿಯೂ ಸಂಬಂಧಿಸಿರುತ್ತದೆ.

ಈ ‘ಸತ್ಯ’ ಘಟನೆಯನ್ನು ನನಗೆ ತಿಳಿಸಿದ ನನ್ನ ಅಜ್ಜಯ್ಯನಿಗೆ ಧನ್ಯವಾದಗಳು.

‘ನಿದ್ದೆವೀರ’ ವೇದೇಗೌಡರಿಗೂ ಸತ್ಯಕ್ಕಳಿಗೂ ಏನು ಸಂಬಂಧ?. ಚಿನ್ನ ಮಾಡಿಕೊಡಲು ಗೌಡರೇನು ಆಚಾರಿಯೇ?, ಅಥವಾ ಹುಡುಕಿಕೊಡಲು ಅವರೇನು ಪೊಲೀಸೇ?, ಎಂದು ತಲೆಯಲ್ಲಿ ಹುಳ ಬಿಟ್ಟುಕೊಳ್ಳಬೇಡಿ. ಅಸಲಿಗೆ ಗೌಡರಿಗೆ ಸತ್ಯಕ್ಕ ಯಾರು ಎಂಬುದೇ ತಿಳಿದಿಲ್ಲ!!!. ಅರ್ಥವಾಗಲಿಲ್ಲವೇ? ತಲೆ ಕೆಟ್ಟು ಕೆರ ಹಿಡಿಯುತ್ತಿದೆಯೇ?. ಚಿಂತಿಸಬೇಡಿ. ಕಥೆಯನ್ನು ಗಮನವಿಟ್ಟು ಓದಿ.

ಒಮ್ಮೆ ನಮ್ಮ ಸತ್ಯಕ್ಕ ಬೀರುವಿನಲ್ಲಿದ್ದ ಅರ್ಧ ಆಭರಣಗಳನ್ನು ಹಾಕಿಕೊಂಡು, ಇನ್ನರ್ಧ ಅಲ್ಲಿಯೇ ಬಿಟ್ಟು ಮದುವೆಗೆ ಹೋಗಿದ್ದರು. ಬಂದು ನೋಡಿದಾಗ ಮನೆಯೆಲ್ಲಾ ಗುಡಿಸಿ ಗುಂಡಾಂತರವಾಗಿತ್ತು. ಮನೆಯಲ್ಲಿದ್ದ ಹಣ ಒಡವೆಗಳೆಲ್ಲಾ ಕಾಣೆಯಾಗಿದ್ದವು. ಗಂಡನಿಗಿಂತ ಹೆಚ್ಚು ಪ್ರೀತಿಸುತ್ತಿದ್ದ ಒಡವೆಗಳು ಕಾಣೆಯಾಗಿದ್ದಕ್ಕೆ ಬಹಳ ದುಃಖಿತರಾದ ಸತ್ಯಕ್ಕ ಪೊಲೀಸ್ ಕಂಪ್ಲೇಂಟ್ ನೀಡಿದರು. ನಮ್ಮ ಪೋಲಿಸರು ಕಳ್ಳರನ್ನು ಹಿಡಿಯುವುದರಲ್ಲಿ ‘ಎತ್ತಿದ ಕೈ’ ಆಗಿರುವುದರಿಂದ ಕಳ್ಳತನವಾಗಿ ನಾಲ್ಕೈದು ತಿಂಗಳಾದರೂ ಕಳ್ಳ ಸಿಕ್ಕಿರಲಿಲ್ಲ. ಸತ್ಯಕ್ಕ ಒಡವೆ ಪಡೆಯುವ ಆಸೆಯನ್ನೇ ಕೈ ಬಿಟ್ಟಿದ್ದರು.

ಈಗ ‘ಎದ್ದೆ - ಮುದ್ದೆ - ನಿದ್ದೆ’ ಖ್ಯಾತಿಯ ವೇದೇಗೌಡರ ವಿಷಯಕ್ಕೆ ಬರೋಣ. ಇವರು ಪ್ರಧಾನಿಯಾಗಿದ್ದಂತ ಸಂದರ್ಭದಲ್ಲಿ ತಮ್ಮ ವಾಸಸ್ಥಾನವಾದ ದಕ್ಷಿಣ ಇಯಾಂಡಿಗೆ ಬರುವಾಗ ವಿಮಾನ ನಿಲ್ದಾಣದಿಂದ ತಮ್ಮ ಮನೆಯವರೆಗೂ ತಮ್ಮ ಭದ್ರತೆಗಾಗಿ ನೂರು ಮೀಟರ್‌ಗೆ ಒಬ್ಬರಂತೆ ಪೋಲೀಸರನ್ನು ನಿಯೋಜಿಸಿರುತ್ತಿದ್ದರು. ಆ ಪೋಲೀಸರದಂತೋ ನಾಯಿ ಪಾಡು. ಊಟ ತಿಂಡಿಬಿಟ್ಟು ಗೌಡರ ಸವಾರಿ ಬರುವುದನ್ನೇ ಕಾಯಬೇಕಾಗುತ್ತಿತ್ತು. ‘ಲೇಟ್ ಲತೀಫ್’ ಗೌಡರು ಬರುವಷ್ಟರಲ್ಲಿ ಪೋಲೀಸರು ಗಾಳಿ ಬಿಟ್ಟ ಬಲೂನಿನಂತಾಗಿರುತ್ತಿದ್ದರು. ಆದರೂ ಕೋಲ್ಗೇಟ್ ಜಾಹೀರಾತಿನಂತೆ ಹಲ್ಲು ಗಿಂಜಿಕೊಂಡು ನಿಲ್ಲಬೇಕಾಗುತ್ತಿತ್ತು. ಹೀಗೆ ಒಂದು ದಿನ ಗೌಡರು ಬರುತ್ತಾರೆಂದು ಎಲ್ಲಾ ಪೋಲೀಸರು ತಮ್ಮ ಗ್ರಹಚಾರವನ್ನು ಹಳಿಯುತ್ತಾ ಭದ್ರತಾ ಕಾರ್ಯಕ್ಕೆ ನಡೆದರು. ನಮ್ಮ ಸತ್ಯಕ್ಕನವರ ಬಡಾವಣೆಯ ಪೋಲೀಸ್ ಠಾಣೆಯಲ್ಲೂ ಒಬ್ಬ ಪೇದೆಯನ್ನು ಬಿಟ್ಟು ಇನ್ನೆಲ್ಲರಿಗೂ ಡ್ಯೂಟಿ ಬಿದ್ದಿತ್ತು. ಡ್ಯೂಟಿ ತಪ್ಪಿಸಿಕೊಂಡ ಪೇದೆ ಬಹಳಾ ಸಂತೋಷದಿಂದ ಒಂದು ದಮ್ ಎಳೆಯಲು ಹತ್ತಿರದ ಬೀಡಿ ಅಂಗಡಿಗೆ ಹೊರಟನು. ಆಗ ಅಲ್ಲೇ ಒಬ್ಬ ಯುವಕ ಬೈಕ್ ಕದಿಯುವ ಪ್ರಯತ್ನದಲ್ಲಿದ್ದುದನ್ನು ಕಂಡು ಅವನನ್ನು ಹಿಡಿದು ಸಾಹೇಬ್ರು ಬರುವವರೆಗೂ ಕುಳಿತಿರು ಎಂದು ಠಾಣೆಯಲ್ಲೇ ಅವನನ್ನು ಕೂರಿಸಿಕೊಂಡಿದ್ದನು. ಅವನು ಮತ್ಯಾರೂ ಅಲ್ಲ. ನಮ್ಮ ಸತ್ಯಕ್ಕನ ಆಭರಣ ಕದ್ದ ಕಳ್ಳ. ಇದು ಪೇದೆಗೆ ತಿಳಿದಿರಲಿಲ್ಲ.

ಇತ್ತ ಆರು ಗಂಟೆಗೆ ಬರಬೇಕಾದ ಗೌಡರು ಹತ್ತು ಗಂಟೆಯಾದರೂ ಬಂದಿರಲಿಲ್ಲ. ಕಾದು ಕಾದು ಬಸವಳಿದಿದ್ದ ಪೋಲೀಸರು ‘ಹ್ಯಾಪುಮೋರೆ’ ಹಾಕಿಕೊಂಡು ‘ಹರಳೆಣ್ಣೆ’ ಮುಖದ ಗೌಡರನ್ನು ಮನದಲ್ಲೇ ಶಪಿಸುತ್ತಿದ್ದರು. ಮೇಲಧಿಕಾರಿಗಳು ಗೌಡರ ಮೇಲಿನ ಕೋಪವನ್ನು ಕೆಳಗಿನವರ ಮೇಲೆ ತೀರಿಸಿಕೊಳ್ಳುತ್ತಿದ್ದರು. ಆದರೆ ಪಾಪ ಕೆಳಗಿನವರು ಯಾರಿಗೂ ಬಯ್ಯಲಾರದೆ ಒಳಗೊಳಗೇ ಉರಿದುಕೊಳ್ಳುತ್ತಿದ್ದರು. ಇತ್ತ ಗೌಡರು ಆಗಮಿಸಿ ತಮ್ಮ ಮನೆಗೆ ತೆರಳಿದ ನಂತರ ಎಲ್ಲರಂತೆ ಸತ್ಯಕ್ಕನ ಬಡಾವಣೆಯ ಸಬ್ ಇನ್‌ಸ್ಪೆಕ್ಟರ್ ಕೂಡಾ ಮನದೊಳಗೇ ಕುದಿಯುತ್ತಾ ಠಾಣೆಗೆ ಆಗಮಿಸಿದನು. ಆಗ ಪೇದೆಯು ಆ ಯುವಕನನ್ನು ತೋರಿಸಿ ನಡೆದ ಘಟನೆಯನ್ನು ವಿವರಿಸಿದನು. ಇನ್‍ಸ್ಪೆಕ್ಟರ್‌ಗೂ ಅವನ್ಯಾರೆಂದು ತಿಳಿದಿರಲಿಲ್ಲ. ಆದರೆ ತಮ್ಮ ಕೋಪ ತಣಿಸಿಕೊಳ್ಳಲು ಅವಕಾಶ ಸಿಕ್ಕಿದ್ದನ್ನು ಕಂಡು ಅವರಿಗೆ ಹಾಲು ಕುಡಿದಷ್ಟು ಸಂತಸವಾಯಿತು. ತಕ್ಷಣ ಗೌಡರನ್ನೂ, ಡ್ಯೂಟಿಗೆ ಹಾಕಿದ ಕಮಿಷರ್‌ನನ್ನೂ ಮನದಲ್ಲೇ ತೆಗಳುತ್ತಾ ಅವನನ್ನು ದನ ಬಡಿಯುವಂತೆ ಬಡಿಯತೊಡಗಿದನು. ಇದನ್ನು ನೋಡಿ ಪೇದೆಗೆ ಆಶ್ಚರ್ಯವೋ ಆಶ್ಚರ್ಯ. ಏಕೆಂದರೆ ಆ ಯುವಕ ಬೈಕ್ ಕದ್ದಿರಲಿಲ್ಲ. ಕದಿಯಲು ಪ್ರಯತ್ನಿಸುತ್ತಿದ್ದನಷ್ಟೆ. ಹಾಗೂ ಇಂತಹಾ ಮೈನರ್ ಕೇಸುಗಳು ಬಂದಾಗ ಒಂದೆರೆಡು ಬಿಗಿದು ಲಂಚ ವಸೂಲಿ ಮಾಡಿ ಕಳಿಸುವುದು ಇನ್‌ಸ್ಪೆಕ್ಟರ್‌ನ ನಿತ್ಯದ ಹವ್ಯಾಸವಾಗಿತ್ತು. ಅದರಲ್ಲಿ ತನಗೂ ಪಾಲು ಕೊಡುತ್ತಿದ್ದಿದುರಿಂದ ಇವನನ್ನು ಪೇದೆ ಹಿಡಿದು ತಂದಿದ್ದನು. ಇತ್ತ ಸ್ವಲ್ಪ ಕೈ ಬಿಸಿ ಮಾಡಿ ಹೋಗಬಹುದೆಂದು ಯೋಚಿಸಿದ್ದ ಕಳ್ಳನು ತನ್ನನ್ನು ಹೀಗೆ ಚಚ್ಚುತ್ತಾರೆಂದು ಎಣಿಸಿರಲಿಲ್ಲ. ತನ್ನ ದರೋಡೆಯ ವಿಷಯ ತಿಳಿದು ತದುಕುತ್ತಿದ್ದಾರೆ ಎಂದುಕೊಂಡು “ಎಲ್ಲವನ್ನೂ ಹೇಳಿಬಿಡುತ್ತೇನೆ ಹೊಡೆಯಬೇಡಿ” ಎಂದು ಗೋಗರೆದನು. ಆಗ ಇನ್‌ಸ್ಪೆಕ್ಟರ್ ಕಿವಿ ಚುರುಕಾಯಿತು. ಇದ್ಯಾವುದೋ ದೊಡ್ಡ ಕೇಸು, ಇದನ್ನು ಹಿಡಿದರೆ ಪ್ರಮೋಷನ್ ಗ್ಯಾರಂಟಿ ಎಂದು ಇನ್ನೂ ಜೋರಾಗಿ ತದಕಲು ಶುರು ಮಾಡಿದನು. ಆಗ ಕಳ್ಳ ಎಲ್ಲವನ್ನೂ ಬಾಯಿ ಬಿಟ್ಟನು. ಆತನು ಹೀಗೆ ಹತ್ತಾರು ಮನೆಗಳಲ್ಲಿ ದರೋಡೆ ಮಾಡಿದ್ದ ವಿಷಯ ಹೊರಗೆ ಬಂತು. ಅವನ ಮನೆಯಲ್ಲಿ ಹುಡುಕಿದಾಗ ಅವನು ಕದ್ದ ಎಲ್ಲಾ ಒಡವಗೆಳೂ ಸಿಕ್ಕಿದವು. ಹೀಗೆ ತಮ್ಮ ಅರಿವಿಲ್ಲದೇ ಗೌಡರು ಸತ್ಯಕ್ಕನ ಒಡವೆ ಸಿಗುವಲ್ಲಿ ಸಹಕರಿಸಿದ್ದರು.

ಕೊನೆಹನಿ : ಗೌಡರು ತಮ್ಮ ಜೀವನದಲ್ಲಿ ಮಾಡಿದ ‘ಒಳ್ಳೆಯ’ ಕೆಲಸ ಇದೊಂದೇ. ಇದನ್ನು ತಮ್ಮ ಅರಿವಿಲ್ಲದೇ ಮಾಡಿದ್ದರಿಂದ ಇದನ್ನು ಅವರ ಪುಣ್ಯದ ಲೆಕ್ಕಕ್ಕೆ ಸೇರಿಸಬಹುದೇ ಬೇಡವೇ ಎಂದು ‘ಯಮ’ ಹಾಗೂ ‘ಚಿತ್ರಗುಪ್ತ’ರಲ್ಲಿ ಜಗಳವಾಗುತ್ತಿದೆ ಎಂಬ ಮಾಹಿತಿ ಇದೆ. ಈ ವಿವಾದ ಅವರು ಅಲ್ಲಿಗೆ ಹೋಗುವುದರ ಮುನ್ನವೇ ಪೂರ್ಣಗೊಳ್ಳಲಿ ಎಂದು ಆಶಿಸೋಣ.

ವೇದೇಗೌಡರು ಪ್ರಧಾನಿಯಾದ ಕಥೆ

ನನ್ನ ಹರಟೆಯ ಕಥೆ(ಕೊರೆತ)ಗೆ ಸ್ವಾಗತ. ನಾನು ‘ಲೈಟ್’ ವೇಯ್ಟ್ ಆಗಿರುವುದರಿಂದ ‘ಲೈಟ್’ ಆಗಿಯೇ ಬರೆಯುತ್ತೇನೆ.ಈ ಬರಹಗಳು ಸ್ವಲ್ಪ ಹಾಸ್ಯ, ಕೀಟಲೆ, ಕಾಲೆಳೆಯುವಂತ ವಿಷಯಗಳನ್ನು ಹೊಂದಿರುತ್ತವೆ.‘ಲೈಟಾದ’ ಬರಹಗಳು ಎಂದರೆ ಹೆಚ್ಚಾಗಿ ಹಗುರವಾದ ಕೆಲವೊಮ್ಮೆ ವಿಶಿಷ್ಟ ಸಂಗತಿಗಳ ಮೇಲೆ ಬೆಳಕು ಚೆಲ್ಲುವ ಲೇಖನಗಳು. ಬರೆಯಲು ನನಗೆ ಪ್ರೇರಕ ಶಕ್ತಿಯಾಗಿರುವವರು ನನ್ನ ಮಾನಸಿಕ ಗುರುಗಳಾದ ದುಂಡೀರಾಜ್, ಶ್ರೀವತ್ಸ ಜೋಷಿ ಮುಂತಾದವರು. ಆದ್ದರಿಂದ ಅಲ್ಪ ಸ್ವಲ್ಪ ‘ಪನ್’ ಕೂಡ ಕಾಣಿಸಿಕೊಳ್ಳಬಹುದು. ಪೀಠಿಕೆ ಇಷ್ಟು ಸಾಕು.

ಎಚ್ಚರಿಕೆ : ಹರಳೆಣ್ಣೆ ಮುಖದವರಿಗೆ ಅರ್ಥಾತ್ ನಗು ಬರದವರಿಗೆ ಈ ಹರಟೆಯಲ್ಲಿ ಪ್ರವೇಶವಿಲ್ಲ.

ಈ ಕೆಳಗಿನ ಕಥೆಯಲ್ಲಿ ಬರುವ ಎಲ್ಲಾ ಘಟನೆಗಳೂ ಕಾಲ್ಪನಿಕ. ಯಾವುದಾದರೂ ವ್ಯಕ್ತಿಗಳಿಗೆ ಸಂಭದಿಸಿದ್ದಲ್ಲಿ ಅದು ಕೇವಲ ಕಾಕತಾಳೀಯ.

ಇಯಾಂಡಿ ಎಂಬ ದೇಶದಲ್ಲಿ ಲೋಕಸಭಾ ಚುನಾವಣೆಯಲ್ಲಿ ಒಮ್ಮೆ ಜನರು ಎಲ್ಲಾ ಸಣ್ಣ ಪುಟ್ಟ ಮರಿ ಪಕ್ಷಗಳಿಗೂ ಮತ ಹಾಕಿ ಗೆಲ್ಲಿಸಿದ್ದರು. ದೊಡ್ಡ ಪಕ್ಷಗಳಿಗೆ ಹೆಚ್ಚು ಸ್ಥಾನ ಬಂದಿದ್ದರೂ ಸರ್ಕಾರ ಮಾಡುವಷ್ಟಿರಲಿಲ್ಲ. ಈ ಮರಿ ಪಕ್ಷಗಳಿಗೆ ಸರ್ಕಾರ ರಚಿಸುವ ಅವಕಾಶ ಸಿಕ್ಕಿದ್ದು ಅದ್ಯಾವುದರ ಕೈಗೋ ‘ಮಾಣಿಕ್ಯ’ ಕೊಟ್ಟ ಹಾಗೆ ಆಗಿತ್ತು. ಈ ಪರಿಸ್ಥಿತಿಯಲ್ಲಿ ಎಲ್ಲಾ ಮರಿ ಪಕ್ಷಗಳೂ ಸೇರಿ ಒಂದು ‘ಮೀಟಿಂಗ್’ (ಈಟಿಂಗ್) ಕರೆದಿದ್ದವು. ಅಲ್ಲಿ ಎಂದರೆ ಸಭೆಯಲ್ಲಿ ನಮ್ಮ ಕಥಾನಾಯಕ ‘ವೇದೇಗೌಡರು’ ನಿದ್ರಾದೇವಿಗೆ ಶರಣಾಗಿದ್ದರು. ಉತ್ತರ ಭಾರತದ ಪ್ರಮುಖ ಮರಿ ಪಕ್ಷಗಳ ನಾಯಕರಾದ ‘ಆಲೂ’ ಹಾಗೂ ‘ಮುಲಾಮು’ ಯಾದವರು ಸಭೆಯಲ್ಲಿ ಕುರ್ಚಿಗಾಗಿ ಭಾರಿ ಹೋರಾಟ ನಡೆಸಿದ್ದರು. ಆದ್ದರಿಂದ ಪ್ರಧಾನ ಮಂತ್ರಿಯ ಆಯ್ಕೆ ಬಹಳ ಕಠಿಣವಾಗಿತ್ತು. ಆಗ ಹಠಾತ್ತನೆ ವೇದೇಗೌಡರಿಗೆ ಎಚ್ಚರವಾಯಿತು. ಅದಕ್ಕೆ ಕಾರಣ ಈ ಹಾಳಾದ ‘ಮೂತ್ರ’. ಮೂತ್ರ ವಿಸರ್ಜನೆಗಾಗಿ ಸಭೆಯಿಂದ ಹೊರನಡೆದರು ನಮ್ಮ ಗೌಡರು. ಆಗ ಎಲ್ಲರಿಗೂ ಇವರೊಬ್ಬರು ಸಭೆಯಲ್ಲಿದ್ದಾರೆ ಎಂಬುದು ಮನವರಿಕೆಯಾಯಿತು!!. ಆಗ ಯಾದವರು ಒಂದು ಒಪ್ಪಂದಕ್ಕೆ ಬಂದರು. ಈ ವೇದೇಗೌಡರನ್ನು ಪ್ರಧಾನ ಮಂತ್ರಿ ಮಾಡಿ ಮುಖ್ಯವಾದ ಖಾತೆಗಳನ್ನು ತಮ್ಮ ಬಳಿ ಇಟ್ಟುಕೊಂಡು ಗೌಡರನ್ನು ‘ಕಂಟ್ರೋಲ್’ ಮಾಡುವುದೆಂದು ತೀರ್ಮಾನವಾಯಿತು. ಗೌಡರು ಪುನಃ ಸಭೆಗೆ ಬರುವಷ್ಟರಲ್ಲಿ ಸಭೆ ಮುಗಿದಿತ್ತು. ಸಭೆ ನಡೆದ ಉತ್ತರ ಇಯಾಂಡಿಯಿಂದ ತಮ್ಮ ವಾಸಸ್ಥಳವಾದ ದಕ್ಷಿಣ ಇಯಾಂಡಿಯವರೆಗೂ ವಿಮಾನದಲ್ಲಿ ತೂಕಡಿಸುತ್ತಲೇ ಬಂದರು ನಮ್ಮ ಶ್ರೀಮಾನ್ ಗೌಡರು. ಕೆಳಗಿಳಿದ ತಕ್ಷಣ ಪತ್ರಕರ್ತರು ಅಭಿನಂದಿಸಿದಾಗ ಗೌಡರು ಕಕ್ಕಾಬಿಕ್ಕಿ!!. ಆಗ ಆಪ್ತ ಕಾರ್ಯದರ್ಶಿ ನಡೆದ ವಿಷಯವನ್ನು ಗೌಡರ ಕಿವಿಯಲ್ಲಿ ಉಸುರಿದರು. ಆಗ ಗೌಡರು ನಾನು ಮುಖ್ಯಮಂತ್ರಿಯಾಗಿ ಮಾಡಿದ ‘ಸಾಧನೆ’ಯನ್ನು ಗಮನಿಸಿ ನನ್ನನ್ನು ಪ್ರಧಾನ ಮಂತ್ರಿ ಮಾಡಿದ್ದಾರೆ ಎಂದು ‘ಮುತ್ತಿನಂತಾ’ ಮಾತೊಂದನ್ನು ‘ಉದುರಿಸಿದರು’.

ಕೊನೆ ಹನಿ : ಈಗಿನ ಲೋಕಸಭೆಯಲ್ಲೂ ಆಲೂ ಯಾದವರು ದಕ್ಷಿಣ ಇಯಾಂಡಿಯವರೊಬ್ಬರನ್ನು ನಾನೇ ಪ್ರಧಾನ ಮಂತ್ರಿ ಮಾಡಿದ್ದು ಎಂದು ಹೇಳಿ ಗೌಡರನ್ನು ಉರಿಸಿದ್ದಾರೆ ಎಂಬುದು ನಮ್ಮ ಗಮನಕ್ಕೆ ಬಂದಿರುವ ‘ಸತ್ಯ’!! ಸಂಗತಿ.